News

Format: 27.09.2020
Format: 27.09.2020

Conferenza TRANSFORM

24. settember 2020 /

Quest onn ha la conferenza TRANSFORM lieu ils 13 da november a Berna. L’impurtanza da «good data» en il sectur public ed en la furmaziun vegn examinada sut differents aspects. Discutà vegn era co che questas datas pon accelerar la digitalisaziun.

www.bfh.ch

Chatscha da stgazis tras la Svizra

22. settember 2020 /

Swisstopo porscha a las scolas ina nova chatscha da stgazis online che passa tras blers lieus turistics svizzers. Quest instrument didactic gida las scolaras ed ils scolars da 10 a 15 onns d’emprender d’enconuscher las geodatas da la Svizra e da las utilisar a moda ludica.

schatz-karte.ch

Pro Juventute: Concurrenza da videos

22. settember 2020 /

En il rom dals Dis svizzers digitals organisescha la Pro Juventute ina concurrenza da films curts. Giavischs per il futur da la giuventetgna e tge che la digitalisaziun contribuescha persuenter, stattan en il center dals filmins. Termin: 12.10.2020.

projuventute.ch

Edulog fa gronds pass

21. settember 2020 / /

Il chantun da Glaruna, Klett & Balmer, nanoo.tv, Dybuster e Typewriter èn ils emprims che sa participeschan ad Edulog. Uschia è reussida ina gronda etappa per Edulog. Ils emprims scolars vegnan ad avair access via Edulog als servetschs online presumablamain anc quest onn da scola.

www.edk.ch

Campagna «Update la Svizra!»

21. settember 2020 /

La campagna «Update la Svizra!» da la Federaziun svizra dals parlaments dals giuvens (FSPG) dat a la giuventetgna da 14 a 25 onns la pussaivladad da metter lur ideas davart la digitalisaziun sin il program da la politica naziunala. Il termin d'annunzia è fixà sin ils 11 d’october 2020.

www.engage.ch

Transfurmaziun digitala en las scolas professiunalas

17. settember 2020 / /

L’Institut federal da scola auta per la furmaziun professiunala (IFFP) sustegna lur scolas cun il program trans:formation per ina transfurmaziun digitala. Cun la pandemia èn er ils basegns da las scolas sa midads. Angela Schaniel, manadra dal program, relata tge effects che quai haja sin il program.

www.eduport.ch

Dieta d’experts digitalisaziun e furmaziun

17. settember 2020 / /

Nua sa chatta la furmaziun l’atun 2020? La pandemia ha sfurzà da reagir spert a circumstanzas novas e nunenconuschentas, ad adaptar elements famigliars e da chattar novas vias. La dieta d’experts ils 5 da november a Berna dat temp e spazi ad ina bilantscha intermediara.

www.educa.ch

Segirar la qualitad da purschidas online

16. settember 2020 /

Il lockdown durant la crisa da corona ha manà tar in enorm augment da purschidas d’emprender online en la furmaziun supplementara. Durant il Di naziunal da qualitad dals 9-11 pon las participantas ed ils participants barattar lur experientschas e sviluppar ideas praticas cun persunas spezialisadas.

alice.ch

Novas prioritads per ina Svizra digitala

14. settember 2020 /

Il Cussegl federal ha approvà la nova strategia actualisada «Svizra digitala», che metta tranter auter in focus pli ferm sin ils aspects liads a las datas. La Svizra vul promover l’access a spazis digitals fidabels per persunas singulas, interpresas e per il sectur public.

www.admin.ch

È la midada persistenta?

10. settember 2020 /

Uss cura che las scolas èn danovamain avertas e che l’instrucziun al lieu ha puspè lieu, sa dat la dumonda sche la midada digitala saja persistenta. Dr. Stefan Wolter e dr. Maria Cattaneo (CSRE Center svizzer da coordinaziun per la retschertga da l'educaziun) preschentan lur resultats.

www.eduport.ch

Dieta da spezialists digitalisaziun e furmaziun

31. avust 2020 / /

Nua va la furmaziun en il decurs da l’atun 2020? La pandemia ha sfurzà da reagir rapid a las circumstanzas novas e nunenconuschentas, d’adaptar ils elements enconuschents e da chattar novas vias. La dieta da spezialists dals 5 da november porscha il spazi ed il temp per ina bilantscha intermediara.

educa.ch

Sistem da furmaziun: «Nus stuain sa colliar en tut la Svizra»

27. avust 2020 / /

La cuntinuaziun da l’instrucziun a distanza dependa dal svilup da la pandemia. Las experientschas fatgas durant quest temp extraordinari duain vegnir tratgas a niz per dumagnar la digitalisaziun en la furmaziun, explitgescha Toni Ritz, directur educa.ch, en in’intervista.

www.eduport.ch

Emprender sut tschiel avert en il temp digital

20. avust 2020 /

Emprender endadens e sut tschiel avert: Tge ha quai da far cun la digitalisaziun? Rolf Jucker, directur da la Fundaziun SILVIVA, explitgescha en il rapport dad Eduport il grond potenzial d’emprender en e cun la natira gist en il temp da la transfurmaziun digitala.

www.eduport.ch

RTS/SRF: Facit davart l’instrucziun a distanza

17. avust 2020 /

Durant la coronacrisa han las scolas stuì introducir tut a la bahuta l’emprender a distanza. Quant bler è restà? Ina retrospectiva ed ina prevista per il cumenzament da las scolas da Radiotelevisiun Svizra RTS/SRF.

www.srf.ch

Castur d’informatica 2020

13. avust 2020 /

La Societad svizra per l’informatica en la furmaziun (SVIA) ha lantschà danovamain il quiz-online che ha lieu dals 2 als 13 da november 2020. Il quiz è adattà per scolaras e scolars da 8 a 20 onns e na basegna nagina presavida. S’inscriver a partir d’immediat.

informatik-biber.ch

Concurrenza: Science on Stage

7. avust 2020 / /

Organisà a moda da festival, pon las persunas d’instrucziun sa preschentar e barattar ideas davart concepts d’emprender e d’instruir en las domenas da las scienzas natiralas e da la tecnologia. Quest onn stattan las ideas actualas cun l’instrucziun a distanza en il center.

naturwissenschaften.ch

«L’emprender stat sur ils cuntegns»

6. avust 2020 / /

L’introducziun rapida da l’emprender a distanza il mars ha rinforzà il diever da web-communities. Quai è era stà il cas tar la plattafurma da barat «Web2-Unterricht» per las persunas d’instrucziun. Co ha la web-community passentà questa perioda? In discurs cun ils auturs dal blog.

www.eduport.ch

Resursas per l’instrucziun

3. avust 2020 / /

Essas Vus a la tschertga da resursas digitalas d’instruir e d’emprender per Vossa instrucziun? Sin educa.Biblio, chattais Vus ina gronda schelta da resursas ch’èn vegnidas controlladas e recumandadas da persunas spezialisadas da furmaziun en Svizra.

biblio.educa.ch

Document d’infurmaziun davart las plattafurmas d’emprender

30. fanadur 2020 / /

L’introducziun rapida da diversas plattafurmas d’emprender durant la pandemia è stada ina gronda sfida per blers responsabels. En quest context, ston uss posteriuramain vegnir exequidas las mesiras da segirtad relevantas. Il document d’infurmaziun d’educa.ch po esser in agid en chaussa.

www.eduport.ch

WELS Online

28. fanadur 2020 /

A la World Education Leadership Symposium Online Conference dal prim fin ils 9 da settember 2020 discurran ils acturs mundials da la furmaziun davart dumondas actualas. L’accent vegn mess sin la crisa da Covid-19 e sin ils resultats dal «SchulBarometer». La conferenza online è gratuita.

wels.edulead.net

Syndicate content

Services

Support