News

Format: 21.07.2018
Format: 21.07.2018

Glisch verda per la Federaziun dals servetschs d’identitad

5. avrigl 2018 / / /

Ils 22 da mars ha l’assamblea plenara da la CDEP approvà il concept detaglià per realisar FIDES. L’agentura spezialisada educa.ch ha elavurà quest concept e vegn ad implementar la fasa da svilup. Il zercladur 2019 vegn la CDEP a decider definitivamain sur da l’andament da FIDES.

edudoc.ch

FinanceMission

1. avrigl 2018 /

Quest gieu educativ vul promover las scolaras ed ils scolars da 13 a 15 onns da s'occupar a moda responsabla cun daners. Sco eroxs sviluppeschan ils giugaders cumpetenzas durablas pertutgant finanzas. Sper il gieu stattan a disposiziun material didactic ed in carnet da lavur per ils scolars.

financemission.ch

i-CAMP: Camp d’informatica a Flem

26. mars 2018 /

Cun sustegn ed accumpagnament da docents e students da la SPF e da la SAPGR pon 60 uffants e giuvenils emprender da programmar. «i-CAMPs Flem» porschan in curs emnil concentrà per scolars da la terza fin la novavla classa durant la stad 2018.

www.phgr.ch

Mobile Stories

26. mars 2018 / /

Per la segunda giada lantscha SRG SSR ina concurrenza da Mobile Stories per giuvnas e giuvens tranter 15 e 24 onns. Las producziuns duain esser low-cost ed integrar tipics elements da mobile-devices (filter, emojis, etc.). Il termin per inoltrar il project è ils 20 da matg 2018.

www.srgd.ch

Potenzial cultural da gieus da video

22. mars 2018 / /

Il Cussegl federal approvescha il rapport davart gieus da video «Games. Ein aufstrebender Bereich des Kulturschaffens». Quest document propona er mesiras per megliurar la promoziun da l’industria da gieus da video sco domena culturala innovativa e transversala.

www.admin.ch

European Schoolnet sin Twitter

22. mars 2018 /

Future Classroom Lab ha creà «@fcl_euschoolnet». Qua chattan ins infurmaziuns ed exempels pratics ed innovativs concernent ils trends educativs, tecnologias novas ed occurrenzas che han lieu a Brüssel.

twitter.com/fcl_euschoolnet

Simposi #digitale21

19. mars 2018 / / /

Tge effects ha la digitalisaziun en la furmaziun ed en la lavur? Respostas pussaivlas a questas dumondas vegnan discutadas dals 11 als 13 d’avrigl 2018 a Lugano entaifer il simposi «#digitale21 - The Effects of Digitalization on Training, Learning and Working in the 21st Century».

www.digitale21.ch

Rait naziunala per la furmaziun MINT

19. mars 2018 /

La Scola auta spezialisada da la Svizra dal nordvest (FHNW) è vi da crear - en collavuraziun cun autras scolas pedagogicas - ina rait naziunala deditgada als roms MINT. La mira è d’augmentar l’interess da la magistraglia e dals students per ils champs da la tecnica e da la scienza natirala.

www.fhnw.ch

Open Data Student Award

15. mars 2018 / / /

opendata.ch realisescha l’emprima concurrenza per studentas e students da las universitads svizras u per tals che han terminà ils studis ils ultims trais onns. Ils participants inoltreschan ina lavur u in studi nua ch’els han utilisà open data u open government data fin ils 31 da matg 2018.

opendata.ch

Summer School

13. mars 2018 / / /

La Summer School «Medias ed informatica» pussibilitescha furmaziun supplementara e barats cun collegas ed experts a medem temp: tranter ils 9 ed ils 13 da fanadur organisescha la SAP da Lucerna in’occurrenza da 5 dis che metta il focus sin la digitalisaziun ed ils midaments en scola.

www.phlu.ch

Digitalisaziun en la scola – schanzas e cunfins?

12. mars 2018 / /

En l’ambient da scola datti numerusas iniziativas sco workshops da programmar per scolars e scolasts. Er il Plan d’instrucziun 21 va en quella direcziun. Co po la scola reagir sin tut questas pretensiuns? La discussiun da podium ha lieu ils 3 da matg 2018 en il B12 a Cuira.

www.phgr.ch

Uffants e moniturs

4. mars 2018 / /

Ils uffants en Svizra prefereschan activitads senza moniturs, era sch’els utiliseschan intensivamain smartphones e tablets. Quai èn ils resultats dal studi MIKE davart l’utilisaziun da medias tar uffants da 6 fin 13 onns. Quest studi recumonda da controllar e limitar il temp avant ils moniturs.

www.zhaw.ch

E-voting per il Grischun

22. favrer 2018 /

Il Cussegl grond dat glisch verda per introducir e-voting. Cun 98 cunter 3 vuschs han deputadas e deputads revedì la lescha. Introducì vegn il votar electronic a partir dal 2020. Er vinavant duain Grischunas e Grischuns avair la pussaivladad da votar a scrit u il di da votaziun a l'urna.

www.rtr.ch

Forum svizzer per la furmaziun

21. favrer 2018 /

Tenor il motto «maschina vs. uman – e la furmaziun?» discuteschan ils participants a la Scola auta spezialisada da Son Gagl suandantas dumondas: Vegnan las maschinas ina giada a stgatschar ils umans? Tge cumpetenzas èn necessarias per il futur? Co sa midan las pretensiuns vi da la furmaziun?

www.fhsg.ch

Emprender d’enconuscher il mund da film

16. favrer 2018 /

La pitschna scola da kino che mussa savida cinematografica è vegnida fundada sin iniziativa da la Laterna magica cun numerus partenaris bain enconuschents. La seria da films curts realisada da cineasts da renum è fatga aposta per in giuven public.

www.kinoschule.org

«Parlo un’altra lingua, ma ti capisco»

12. favrer 2018 / /

La Fundaziun Coscienza Svizzera organisescha ina concurrenza davart la plurilinguitad per las classas dal stgalim secundar I. Las scolaras ed ils scolars pon trametter in manuscrit fin ils 2 da mars 2018. Sche quel gudogna, survegnan els ils meds per realisar in film curt durant l’onn 2018.

www.parlounaltralingua.ch

Set mesiras per la scola dal futur

12. favrer 2018 / /

Il nov dossier politic d'economiesuisse enumerescha set pussaivladads co ch’il sistem da furmaziun svizzer po dumagnar la transfurmaziun digitala. Sin stgalim primar duessan per exempel ils roms matematica e lingua vegnir instruids per gronda part a moda digitala.

www.economiesuisse.ch

Festival da film GaYA

8. favrer 2018 / /

A chaschun dal Festival da film GaYA «My Alps – My Chance» èn ils giuvenils envidads a producir clips da video davart ina tematica alpina. Il termin d’inscripziun è fixà sin ils 31 da matg. Ils 15 megliers clips vegnan preschentads a Chambéry ils 30 da november u il 1. da december 2018.

www.alpine-space.eu

JAMESfocus «Films, gieus e YouTuber»

7. favrer 2018 / /

Il nov studi JAMESfocus realisà da la Scola auta turitgaisa per scienzas applitgadas (ZHAW) examinescha il cumportament medial da la giuventetgna pertutgant films, gieus e YouTubers preferids. El revelescha a medem temp sche la giuventetgna resguarda las recumandaziun da vegliadetgna.

www.zhaw.ch

Nov studi davart cyberviolenza

6. favrer 2018 / /

Dapli che la mesadad dals uffants tranter 8 e 12 onns suffrescha d’almain in problem da cyberviolenza. Quai è in dals resultats da la retschertga tar passa 34’000 uffants en 29 pajais manà tras dal DQ (Digital Intelligence) Institute e dal Forum economic mundial.

www.weforum.org

Syndicate content

Job

Support