Svilup
Ils differents profils da la furmaziun professiunala superiura duain vegnir rinforzads e delimitads meglier visavi autras purschidas da furmaziun sco p.ex. la furmaziun supplementara orientada a la professiun. L'onn 2007 è vegnida fundada la conferenza svizra da las scolas professiunalas superiuras (conferenza SPS).
Lescha federala davart la furmaziun professiunala (LFPr)
Sa basond sin la revisiun da la constituziun federala dals 18 d'avrigl 1999 (art. 63) èsi vegnì surdà a la confederaziun da reglar legalmain l'entira furmaziun professiunala. Cun la lescha federala dals 13 da december 2002 davart la furmaziun professiunala (LFPr) vegnan tut las professiuns che stattan ordaifer il sistem da las scolas autas suttamessas ad in sistem unitar e daventan pia cumparegliablas ina cun l'autra. La lescha federala davart la furmaziun professiunala (LFPr) è entrada en vigur il 1. da schaner 2004 ed ha recepì sut la cumpetenza da la confederaziun las professiuns che vegnan regladas en auters relaschs federals da l'agricultura e da la selvicultura sco er che vegnivan regladas avant sin plaun chantunal resp. interchantunal da la sanadad, dals fatgs socials e da l'art. La revisiun da la lescha federala davart la furmaziun professiunala (LFPr) mussa novas vias differenziadads per la furmaziun professiunala e promova la permeabilitad dal sistem da furmaziun.
Vi da la realisaziun da la lescha federala davart la furmaziun professiunala (LFPr) èn participads ils chantuns, la confederaziun e las organisaziuns dal mund da lavur (OdML); refurmas respectivas èn en curs en tut ils champs da la furmaziun professiunala. Er per la furmaziun professiunala superiura datti pia novaziuns; tranter auter:
-
Renconuschientscha dals plans d'instrucziun generals da las scolas professiunalas superiuras (SPS)
Cun l'ordinaziun dal departament federal d'economia (DFE) davart las prescripziuns minimalas per la renconuschientscha da furmaziuns e da studis da diplom supplementar da las scolas professiunalas superiuras dals 11 da mars 2005 èn vegnidas regladas las premissas, sut las qualas las furmaziuns ed ils studis da diplom supplementar a las scolas professiunalas superiuras vegnan renconuschids sin plaun federal. Da nov sa basa mintga furmaziun sin in plan d'instrucziun general che vala per l'entira Svizra.
-
Sistem da finanziaziun da la furmaziun professiunala
La lescha federala davart la furmaziun professiunala (LFPr) prevesa in nov sistem da finanziaziun en la furmaziun professiunala che passa d'ina subvenziun orientada als custs ad ina tala orientada a las prestaziuns. Contribuziuns federalas vegnan pajadas sco indemnisaziuns pauschalas als chantuns. Ils chantuns ston perquai adattar lur cunvegnas da libra circulaziun e da finanziaziun en il sectur da la furmaziun professiunala. En il rom d'in masterplan ch'è vegnì concepì communablamain da la confederaziun e dals chantuns vegnan creadas actualmain las premissas per ina cunvegna en il sectur da la furmaziun professiunala superiura. Per quest intent sto vegnir etablida cunzunt la transparenza en il sectur dals custs sco er fixads ils criteris per las contribuziuns dal paun public.
Permeabilitad e mobilitad
Sin il champ da la furmaziun professiunala è l'uniun europeica vidlonder da garantir permeabilitad, transparenza e mobilitad (process da Copenhagen). Analogamain al sistem europeic da transferiment da credits academics (european credit transfer and accumulation system, ECTS) en il sectur da las scolas autas, vegn prendì en mira in agen model per la furmaziun professiunala (european credits for vocational education and training, ECVET). La Svizra è participada – sin il plaun da las expertas e dals experts – activamain a quest process, e quai en collavuraziun cun l'uniun europeica.
Cun meglierar la permeabilitad dal sistem da furmaziun svizzer vegn discutada la permeabilitad tranter la furmaziun professiunala superiura e las scolas autas.
Ulteriuras infurmaziuns
