Organisaziun

Examens professiunals federals (EPF) ed examens professiunals superiurs (EPS)

Las preparaziuns per ils examens n'èn betg reglementadas. Las instituziuns da furmaziun publicas u privatas u las organisaziuns dal mund da lavur (OdML) che porschan curs preparatorics en chaussa, defineschan il program, la durada ed il nivel da scolaziun. Ils curs vegnan absolvids en moda cumplementara a la professiun e duran trais fin quatter semesters. La preparaziun po er avair lieu en moda autodidactica. Las organisaziuns dal mund da lavur (OdML) organiseschan ina u duas giadas per onn ils examens ch'èn reglementads sin plaun federal. Ils examens professiunals federals vegnan terminads cun in certificat professiunal federal. Sco titel po vegnir agiuntà a la designaziun professiunala il supplement "cun certificat professiunal federal". Ils examens professiunals federals superiurs serran cun in diplom ch'è renconuschì sin plaun federal. A la designaziun professiunala respectiva po vegnir agiuntà il supplement "diplomada u diplomà".

Scolas professiunalas superiuras (SPS)

La furmaziun a temp cumplain dura – cumprais ils praticums – almain dus onns, la furmaziun cumplementara a la professiun almain trais onns. En cas da studis cumplementars a la professiun è prescritta in'activitad professiunala sin il champ respectiv d'almain 50%. Per las furmaziuns valan dumbers minimals d'uras d'emprender. Las purschidras ed ils purschiders da furmaziun relaschan in urden da promoziun. La procedura da qualificaziun per il diplom final è reglada en l'ordinaziun dal departament federal d'economia (DFE) davart las prescripziuns minimalas per la renconuschientscha da furmaziuns e da studis da diplom supplementar da las scolas professiunalas superiuras. La procedura da qualificaziun consista almain d'ina lavur da diplom u da project pratica e d'examens a bucca ed en scrit. Ulteriuras pretensiuns vegnan regladas en ils plans d'instrucziun generals.

Ils titels che vegnan surdads da scolas professiunalas superiuras (SPS) e ch'èn renconuschids sin plaun federal, giaudan protecziun legala. En il diplom vegnan la furmaziun ed il titel respectiv menziunads cun "dipl." (diplomada u diplomà) e cun las cumplettaziuns "SPS" (scola professiunala superiura).

European credits for vocational education and training (ECVET)

Las cumpetenzas resp. las qualificaziuns che vegnan cuntanschidas en la furmaziun professiunala duain vegnir transferidas – sumegliantamain al sistem europeic da transferiment da credits academics (european credit transfer and accumulation system, ECTS) en il sectur da las scolas autas – en in sistem da credits renconuschì per la furmaziun professiunala (european credits for vocational education and training, ECVET). Las lavurs concepziunalas correspundentas han cumenzà en l'uniun europeica. Er l'uffizi federal da furmaziun professiunala e da tecnologia (UFFT) è sa participà a quellas.