Cuntegns d'instrucziuns

Examens professiunals federals (EPF) ed examens professiunals superiurs (EPS)

Las preparaziuns per ils examens n'èn betg reglementadas. Per regla frequentan las candidatas ed ils candidats curs preparatorics. Ils cuntegns ed il program sa drizzan tenor las prescripziuns dals urdens d'examen, ils quals vegnan reglads da las organisaziuns dal mund da lavur (OdML) ch'èn cumpetentas per els, ed ils quals ston vegnir approvads da l'uffizi federal da furmaziun professiunala e da tecnologia (UFFT).

La gronda part dals examens professiunals federals vegnan organisads per las professiuns da planisadra u da planisader da marketing, da spezialista u da spezialist en fatgs da persunal, da contabla u da contabel e d'informaticra u d'informaticher.

La gronda part dals diploms (examen professiunal federal superiur) vegnan obtegnids en ils secturs da l'informatica economica, da la direcziun da vendita, da l'analisa da finanzas e da l'agricultura.

Scolas professiunalas superiuras (SPS)

A las scolas professiunalas superiuras (SPS) vegnan purschidas furmaziuns en ils suandants secturs:

Las furmaziuns sa drizzan mintgamai tenor in plan d'instrucziun general che las purschidras e ch'ils purschiders da furmaziun sviluppan en collavuraziun cun las organisaziuns dal mund da lavur (OdML). L'uffizi federal da furmaziun professiunala e da tecnologia (UFFT) approvescha ils plans d'instrucziun generals sin proposta da la cumissiun federala per scolas professiunalas superiuras (CFSPS) Ils plans d'instrucziun generals determineschan tranter auter il profil professiunal e las cumpetenzas che duain vegnir cuntanschidas, ils titels, ils champs da furmaziun e lur procentualas temporalas, sco er ils cuntegns tematics generals. Lingua d'instrucziun è mintgamai la lingua naziunala. Ina instrucziun bilingua ed englais sco lingua d'instrucziun èn pussaivels.