Cundiziuns d'admissiun

Examens professiunals federals (EPF) ed examens professiunals superiurs (EPS)

Als examens professiunals federals vegn per regla admess tgi che ha absolvì ina furmaziun fundamentala professiunala da trais u da quatter onns e tgi che po cumprovar ina pratica professiunala da plirs onns. Il medem vala per ils examens professiunals federals superiurs. Mintgatant sto dentant vegnir fatg ordavant in examen professiunal. Las organisaziuns dal mund da lavur (OdML) reglan las cundiziuns d'admissiun che figureschan en ils differents urdens d'examen.

Scolas professiunalas superiuras (SPS)

Supplementarmain al diplom dal stgalim secundar II (furmaziun fundamentala professiunala da trais u da quatter onns cun attest federal da qualificaziun, scola media terminada, maturitad gimnasiala) èn dumandadas per part in'experientscha professiunala ed in'examinaziun da la qualificaziun per l'admissiun a las furmaziuns da las scolas professiunalas superiuras (SPS). Ulteriuras cundiziuns d'admissiun èn regladas per ils differents secturs en l'agiunta a l'ordinaziun dal departament federal d'economia (DFE) davart las prescripziuns minimalas per la renconuschientscha da furmaziuns e da studis da diplom supplementar da las scolas professiunalas superiuras. La dimensiun ed il cuntegn da las examinaziuns da la qualificaziun vegnan reglads da las instituziuns ch'èn responsablas per la furmaziun.