Cumpareglià cun la scolaziun speziala sin il stgalim primar ed il stgalim secundar I (scola obligatorica) n'è la purschida da la preparaziun a la professiun e la furmaziun professiunala da persunas cun impediments betg uschè gronda. Las pussaivladads da la furmaziun cuntinuanta e da l'access a la professiun dependan da l'impediment.

 

Lescha davart la furmaziun professiunala (LFPr)
Per ils giuvenils cun difficultads da scolaziun e da furmaziun porscha la Lescha davart la furmaziun professiunala dal 1. da schaner 2004 la pussaivladad da far in emprendissadi professiunal scursanì da dus onns cun in attestat federal per differents secturs (cf. il sequent document per dapli infurmaziuns). I dat ulteriuras purschidas per giuvenils, las qualas na correspundan betg a las pretensiuns da l'attestat federal, per exempel la furmaziun pratica tenor INSOS.

Cussegliaziun professiunala
En mintga cas èn ils uffizis chantunals da cussegliaziun professiunala ed eventualmain ils uffizis da cussegliaziun professiunala federals da l'Assicuranza d'invaliditad (AI) las meglras funtaunas per la tscherna da la professiun. La cussegliaziun professiunala AI vegn tgirada dals Uffizis AI chantunals (LAI art. 57, d). Las adressas chattais Vus qua.

Sustegn finanzial
Ins sto vesair che, malgrà l'entrada en vigur da la RPT il 1. da schaner 2008, l'Assicuranza d'invaliditad (AI) resta responsabla per il pajament dals custs supplementars chaschunads entras la furmaziun professiunala iniziala dals giuvenils che correspundan als criteris da l'AI (l'art. 16 LAI è anc adina en vigur).