Indicaziuns statisticas rimnadas a moda sistematica e per l'entir intschess svizzer davart uffants e giuvenils che basegnan ina scolaziun speziala datti mo paucas en Svizra. Per l'onn da scola 2006/2007 numna la statistica da furmaziun radund 46'276 scolaras e scolars cun in plan d'instrucziun spezial, quai correspunda ad ina quota da 5.8% dal dumber total dals uffants e giuvenils da la scola populara (scola primara e scola secundara I). Las differenzas regiunalas èn però fitg grondas. La quota d'uffants cun in plan d'instrucziun spezial va dad 1,9% (Vallais) fin a 9.2% (Basilea-Champagna) (funtauna UFS).

 

Finanziaziun
Tenor la statistica AI han survegnì il 2007 radund 42'000 uffants e giuvenils contribuziuns per mesiras da scolaziun speziala. Circa la mesadad da quests uffants u giuvenils ha visità ina scola speziala. L'autra mesadad ha fatg diever en la vegliadetgna prescolara u parallelamain a la scola primara da mesiras terapeutic-pedagogicas finanziadas da l'AI. Las contribuziuns da l'AI per questas mesiras muntan a radund 338 miu. francs, quai che correspunda ad ina media da 8'048 francs per uffant. Plinavant finanziescha la AI ils chantuns en il sectur dal tractament logopedic cun 43 miu. francs e las scolas da pedagogia curativa ed ils servetschs da preeducaziun cun 414 miu. francs per contribuziuns da construcziun e da gestiun (funtauna UFS).

Cun l'entrada en vigur da la RFI per il 1. da schaner 2008 èn ils chantuns responsabels per la finanziaziun da la scolaziun speziala d'uffants e giuvenils e per mesiras pedgogicas spezialas.