RSS è in format che sa basa sin XML e n'è betg dependent da la plattafurma. RSS dovran ins per barattar novitads ed auters cuntegns dal web. L'abreviaziun RSS stat per "Really Simple Syndication" (sco era per "Rich Site Summary" u "RDF Site Summary").
Cuntrari a las paginas da HTML na cuntegnan las datas RSS (RSS-Feeds) nagins elements da design e layout. Uschia pon ils RSS-Feeds vegnir legids dals clients independentamain da la plattafurma -  e quai cun agid dad in RSS-Reader sco era cun agid dad in Reader dal server.
Uschia pon ils cuntegns da las datas da RSS vegnir preschentads sco quai ch'i plascha a l'utilisader. Per regla vegnan  preschentads ils titels da las novitads resp. da las infurmaziuns. La novitad sco tala resta sin il server d'origin.

Ina muntada adina pli gronda survegn RSS era en il sectur da furmaziun. Gest il barat automatisà dad infurmaziuns da furmaziun en la rait naziunala da furmaziun sco era tranter instituziuns europeicas u internaziunalas gudogna ina muntada adina pli gronda. Sper servers naziunals e regiunals da l'Europa promova era il European Schoolnet (EUN) l'introducziun da RSS - tecnologia per la rait europeica da furmaziun.