Suenter avair frequentà la scola obligatorica, passan ils giuvenils al stgalim secundar II. Il stgalim secundar II vegn dividì en scolaziuns da furmaziun generala ed en talas da furmaziun professiunala. Scolas da furmaziun generala èn scolas da maturitad gimnasiala (gimnasis) e scolas medias professiunalas (SMPr). La furmaziun fundamentala professiunala po vegnir absolvida en manaschis d'emprendissadi cun ina instrucziun cumplementara en las scolas professiunalas spezialisadas ed en curs intermanaschials u en purschidas da scolaziun a temp cumplain sco en lavuratoris d'emprendissadi u en scolas professiunalas a temp cumplain. Per giuvenils che na pon betg cumenzar - suenter ch'els han terminà il stgalim secundar I - directamain ina furmaziun fundamentala professiunala u ina scola da cuntinuaziun dal stgalim secundar II, stattan a disposiziun purschidas transitoricas. Circa dus terzs dals giuvenils entran - suenter il stgalim secundar I - en la furmaziun fundamentala professiunala. In terz elegia ina scolaziun da la furmaziun generala (scola da maturitad gimnasiala u scola media professiunala).

 

Purschidas transitoricas
Las purschidas transitoricas èn daventadas pli frequentas ils onns passads. I dat differents models da purschidas transitoricas cumbinadas (activitads praticas en manaschis e furmaziun generala), purschidas expressivamain da scola sco er purschidas transitoricas d'integraziun (instrucziun per giuvenils da lingua estra per part cun praticums). Tras questas purschidas duai vegnir gidà als giuvenils a chattar la dretga professiun ed a s'integrar en il mund da lavur ed els duain vegnir preparads per entrar en la furmaziun professiunala u en scolaziuns da furmaziun generala dal stgalim secundar II, en moda che lur qualificaziuns centralas vegnan promovidas ed en moda che lur mancanzas individualas vegnan eliminadas. Las purschidas transitoricas èn facultativas, tut tenor ston lur custs vegnir surpigliads e lur proceduras d'admissiun èn specificas. La lescha federala davart la furmaziun professiunala (LFPr) prevesa ch'ils chantuns prendan mesiras per preparar las persunas che han deficits individuals da furmaziun a la fin dal temp da scola obligatoric, per la furmaziun fundamentala professiunala. Quai ha per consequenza chi vegnan reorganisadas las purschidas transitoricas en ils chantuns.

Durada da la scolaziun e terminaziun
Las differentas scolaziuns sin il stgalim secundar II duran dus fin quatter onns. 90% da tut ils giuvenils fan in diplom sin il stgalim secundar II. La midada da la scola obligatorica al stgalim secundar II duai vegnir optimada, per cuntanscher che 95% da tut ils giuvenils fetschian in diplom sin il stgalim secundar II a partir da l'onn 2015. Ils giuvenils termineschan il stgalim secundar II en la vegliadetgna da 18/19 onns e survegnan in certificat final correspundent.

Scolas da cuntinuaziun
Tut tenor il diplom dal stgalim secundar II po vegnir pratitgada immediat ina professiun u po vegnir cumenzada ina scolaziun sin il stgalim terziar - ubain ad ina scola auta (scolas autas universitaras [SAU], scolas autas professiunalas [SAPr], scolas autas da pedagogia [SAP] ubain ina scolaziun da la furmaziun professiunala superiura (scolas professiunalas superiuras [SPS], examens professiunals federals [EPF], examens professiunals superiurs [EPS]).