Suenter la scola obligatorica, pia suenter nov onns da scola, entran ils giuvenils en il stgalim secundar II. Il stgalim secundar II sa lascha divider en scolaziuns da furmaziun generala e da furmaziun professiunala. Scolas da furmaziun generala èn scolas da maturitad (gimnasis) e scolas medias spezialisadas (SMS). La furmaziun professiunala po vegnir absolvida en manaschis d'emprendissadi cun instrucziun cumplementara en las scolas professiunalas ubain en ina instituziun da scolaziun a temp cumplain sco lavuratoris d'emprendissadi u scolas professiunalas a temp cumplain.

 

Durada da scolaziun e finiziun
Las differentas scolaziuns sin il stgalim secundar II duran dus fin quatter onns. Var 90% dals giuvenils en Svizra fineschan quellas. Els survegnan in certificat final correspundent.

Scolaziun cuntinuanta
Tut tenor il diplom sin il stgalim secundar II pon ins far ina scolaziun cuntinuanta sin il stgalim terziar - ubain a las scolas autas (universitads, scolas politecnicas federalas [SPF], scolas autas professiunalas) ubain in'ulteriura scolaziun sin il stgalim terziar (scolas spezialisadas superiuras, examens professiunals ed examens professiunals superiurs).

Svilup dal stgalim secundar II
Las scolas autas universitaras e las organisaziuns dal mund da lavur influenzeschan dapi il cumenzament dal 19avel tschientaner il svilup dal stgalim secundar II en Svizra.
Il stgalim secundar II sa chatta actualmain en in temp da refurmas: las finamiras essenzialas èn da render pli permeablas las scolaziuns, da las coordinar meglier e da las sviluppar a moda cumplessiva.