En Svizra vegni differenzià tranter l'educaziun prescolara ("scolina", "Kindergarten", "école enfantine", "scuola dell'infanzia") e la tgira d'uffants en la vegliadetgna prescolara ordaifer la famiglia (canortas, mammas dal di, gruppas da gieu).
Fin l'onn 1970 è la scolina (resp. "Kindergarten" en la Svizra tudestga, "école enfantine" en la Svizra franzosa e "scuola dell'infanzia" en la Svizra taliana) vegnida francada en la legislaziun da tut ils chantuns da la Svizra. En la plipart dals chantuns vegn l'educaziun prescolara reglada en la lescha da scola ed en l'ordinaziun davart la scola populara. En intgins chantuns datti in'atgna lescha da scolina.

 

Finanziaziun
Las scolinas vegnan finanziadas en emprima lingia da las vischnancas. Ils chantuns pajan contribuziuns als custs da salari da las mussadras e dals mussaders. En tut ils chantuns han ils uffants, avant ch'entrar en la scola obligatorica, il dretg d'ina educaziun prescolara d'almain in onn, en la mesadad dals chantuns da dus onns. En ils chantuns vegnan actualmain fatgs discussiuns e sforzs per far in obligatori da scolina.

Avischinaziun da la scolina e da la scola
Dapi la mesadad dals onns 1980 han ins augmentà las stentas per in'avischinaziun da la scolina e da la scola primara. Surtut dapi ils onns 1990 tractan numerus studis dumondas en connex cun la reorganisaziun da la fasa d'entrada en scola. Las novas ideas pertutgan ils suandants aspects: flexibilisaziun da la vegliadetgna d'ir a scola, promoziun tempriva da las tecnicas culturalas, classas eterogenas (areguard la vegliadetgna, il svilup, ils talents, la derivanza e.u.v.) ed innovaziuns didacticas. En plirs chantuns vegnan actualmain realisads ed evaluads projects che han la finamira da cumbinar la scolina cun ils emprims onns da scola.