Cleras finamiras
En il rom da la tractaziun dal program annual 2006 da la regenza ha il cussegl grond nizzegià la chaschun da tschentar dumondas areguard ils pli differents secturs. Scolaziun, laina e GRiform èn stads en il center da las discussiuns. Unanimamain ha il cussegl grond la fin finala decidì d'avair prendì enconuschientscha dal program e ha cumenzà cun la tractaziun dal preventiv dal chantun per l'onn vegnent. Il cussegl grond ha decidì il glindesdi d'entrar e da tractar il program annual da la regenza per l'onn 2006. Las finamiras e las intenziuns strategicas tar ils differents puncts da svilup sa basan sin il program e plan da finanzas per ils onns 2005-08. En quel punctuescha la regenza tranter auter las rescas e la povradad sin il sectur social, la cumplexitad dals problems e dals pensums sin il sectur politic, mo er il squitsch da spargnar. Problematica è pli e pli er la concurrenza sin il sectur economic e la pressiun d'innovaziun. La regenza fa dentant er quitads davart la midada dal clima e las consequenzas da quella per la vita e l'economia en las regiuns muntagnardas.
Scolaziun sut squitsch
La cumissiun da strategia dal cussegl grond beneventa las intenziuns da la regenza. Perencunter crititgescha la fracziun da la Partida socialdemocrata l'agir sin differents secturs. "En il program vegn accentuà l'impurtanza da la scolaziun. Quai stat dentant en cuntradic- ziun totala cun il succedì ils davos onns, numnadamain l'introducziun dal numerus clausus tar la scola media u la reducziun da las contribuziuns per perfecziun da scolasts e creschids", punctuescha la deputada socialdemocrata Gitta Caviezel. La presidenta da la regenza, cussegliera guvernativa Eveline Widmer-Schlumpf, ha accentuà, che la regenza fetschia quai ch'il cussegl grond haja adossà ad ella: "Igl è adina ina dumonda co ils daners vegnan impundids." Tenor cusseglier guvernativ Claudio Lardi è la scursanida tar la scolaziun succedida punctualmain. Quella saja stada da caracter strategic. Deputà Martin Jäger ha crititgà l'agir dal chantun sin il sectur da las plazzas d'emprendissadi. I na saja betg mo da punctuar la necessitad da quellas, mabain er da promover sezs quellas enstagl da stritgar ulteriuras.
GRiforma - tema permanent
Da discussiunar ha er dà l'agir dal chantun sin il sectur da las scolas autas. Tenor Claudio Lardi vegn planisà il mument ina nova rait da datas tranter las scolas autas ed ils differents secturs da la perscrutaziun. Cun quai duai er la collavuraziun interdisciplinara vegnir promovida. Tema da discussiun è ina giada dapli er la GRiforma stada. Deputà Jon Peider Lemm (pps, S-chanf) è sa mussà fitg sceptic envers l'entir project. La presidenta da la regenza Eveline Widmer-Schlumpf ha defendì la refurma da l'administraziun. Ella avessia manà gugent la discussiun dal rapport cun il parlament actual. Quella saja dentant pussaivla pér l'october vegnent. La regenza vegnia a preschentar ils avantatgs e dischavantatgs da la direcziun da l'administraziun. I saja dentant necessari da manar en l'avegnir tut ils secturs da l'administraziun tenor il medem model. En discussiun è er stada la Viafier retica, respectivamain l'infrastructura da quella. Tenor cusseglier guvernativ Stefan Engler è l'interpresa lundervi da meglierar sia infrastructura, tranter auter ils vaguns. Ils organs responsabels vegnian a sclerir las pussaivladads dals meds d'investiziun ed il chantun veglia sa gidar en il rom da sias pussaivladads.
La Quotidiana
Scolaziun sut squitsch
La cumissiun da strategia dal cussegl grond beneventa las intenziuns da la regenza. Perencunter crititgescha la fracziun da la Partida socialdemocrata l'agir sin differents secturs. "En il program vegn accentuà l'impurtanza da la scolaziun. Quai stat dentant en cuntradic- ziun totala cun il succedì ils davos onns, numnadamain l'introducziun dal numerus clausus tar la scola media u la reducziun da las contribuziuns per perfecziun da scolasts e creschids", punctuescha la deputada socialdemocrata Gitta Caviezel. La presidenta da la regenza, cussegliera guvernativa Eveline Widmer-Schlumpf, ha accentuà, che la regenza fetschia quai ch'il cussegl grond haja adossà ad ella: "Igl è adina ina dumonda co ils daners vegnan impundids." Tenor cusseglier guvernativ Claudio Lardi è la scursanida tar la scolaziun succedida punctualmain. Quella saja stada da caracter strategic. Deputà Martin Jäger ha crititgà l'agir dal chantun sin il sectur da las plazzas d'emprendissadi. I na saja betg mo da punctuar la necessitad da quellas, mabain er da promover sezs quellas enstagl da stritgar ulteriuras.
GRiforma - tema permanent
Da discussiunar ha er dà l'agir dal chantun sin il sectur da las scolas autas. Tenor Claudio Lardi vegn planisà il mument ina nova rait da datas tranter las scolas autas ed ils differents secturs da la perscrutaziun. Cun quai duai er la collavuraziun interdisciplinara vegnir promovida. Tema da discussiun è ina giada dapli er la GRiforma stada. Deputà Jon Peider Lemm (pps, S-chanf) è sa mussà fitg sceptic envers l'entir project. La presidenta da la regenza Eveline Widmer-Schlumpf ha defendì la refurma da l'administraziun. Ella avessia manà gugent la discussiun dal rapport cun il parlament actual. Quella saja dentant pussaivla pér l'october vegnent. La regenza vegnia a preschentar ils avantatgs e dischavantatgs da la direcziun da l'administraziun. I saja dentant necessari da manar en l'avegnir tut ils secturs da l'administraziun tenor il medem model. En discussiun è er stada la Viafier retica, respectivamain l'infrastructura da quella. Tenor cusseglier guvernativ Stefan Engler è l'interpresa lundervi da meglierar sia infrastructura, tranter auter ils vaguns. Ils organs responsabels vegnian a sclerir las pussaivladads dals meds d'investiziun ed il chantun veglia sa gidar en il rom da sias pussaivladads.
La Quotidiana
